ದೇವತೆಗಳ ಜೂಮ್ ಮೀಟಿಂಗು

 

ಕೊರೊನಾ ಸೋಂಕಿನ  ಭೀತಿಯಿಂದ ರಾಷ್ಟ್ರಾದ್ಯಂತ ಲಾಕ್ ಡೌನ್ ಜಾರಿಯಾಗಿ   ಮೂರು ತಿಂಗಳು ಎಲ್ಲಾ ಗುಡಿ- ಗುಂಡಾರ, ದೇವಾಲಯ, ಧಾರ್ಮಿಕ  ಕ್ಷೇತ್ರಗಳನ್ನು ಮುಚ್ಚಲಾಗಿತ್ತು . ಹಾಗಾಗಿ ಇಷ್ಟು ದೀರ್ಘ ಕಾಲ  ದೇವರ ದರ್ಶನದಿಂದ ದೂರಾಗಿ ಭಕ್ತ ಕೋಟಿಗೆ ಒಂದು ರೀತಿಯ ಬೇಸರ ನೋವು ಕಾಡುವುದು ಸಹಜ . ಕಾರಣ ಇಂತಹದೊಂದು ಮಹಾಮಾರಿ ಹುಟ್ಟಿಕೊಂಡು , ಜನ ಸಮುದಾಯಕ್ಕೆ ಸೋಂಕು ಹರಡಿಸುವ ಭಯ ಹುಟ್ಟಿಸಿ, ಅನ್ಯತಾ ಶರಣಂ ನಾಸ್ತಿ  ಎಂದು ನಂಬಿದ್ದ ದೇವರ ದರ್ಶನಕ್ಕೂ ಅಡ್ಡಿ  ಆಗಿದ್ದು  ಭಾರತದ ಇತಿಹಾಸದಲ್ಲೆ ಮೊದಲು ಎನ್ನಬಹುದು .  

ಇನ್ನು ಒಂದು ಸೆಕೆಂಡು ಸಹ ಬ್ರೇಕ್ ಇಲ್ಲದಂತೆ, ಆಶೀರ್ವಾದಿಸಲೆತ್ತಿದ   ಕೈಗಳನ್ನು ಕೆಳಗಿಳಿಸಲೂ ಪುರುಸೊತ್ತಾಗದಂತೆ  ಅಸಂಖ್ಯಾತ  ಭಕ್ತರು ಕೈಮುಗಿದು ತನ್ಮತೆಯಿಂದ ಕಣ್ಣು ಮುಚ್ಚಿ  ಇಡುತ್ತಿದ್ದ ಬೇಡಿಕೆಗಳು ,ಕೆಲವೊಮ್ಮೆ ಡೀಮ್ಯಾಂಡು, ದೂರುಗಳು ಎಲ್ಲವನ್ನು ಆಲಿಸಿ ಸುಸ್ತಾಗಿದ್ದ  ದೇವಾನುದೇವತೆಗಳಿಗೆ ಈ ಲಾಕ್ದೌನ್ನಿಂದಾಗಿ  ಎರಡು ತಿಂಗಳು ಸಂಪೂರ್ಣ ವಿಶ್ರಾಮ ಒದಗಿ ಭಕ್ತರ  ಕಾಟವಿಲ್ಲದೆ ಹಾಯಾಗಿದ್ದರು  .ಈ ಅಪರೂಪದ ರಜೆ ಪ್ರಾಪ್ತಿಯಾದ  ಖುಷಿಯಲ್ಲಿ ಎರಡು ತಿಂಗಳು  ಬೇಸಿಗೆ ರಜಾ ಸಿಕ್ಕ  ಮಕ್ಕಳಂತೆಯೆ ಭಗವಂತನೂ ಕುಣಿದು ಕುಪ್ಪಳಿಸಿರಬಹುದು!.

ಲಾಕ್ ಡೌನ್ ಸಮಯದಲ್ಲಿ  ಜನಸಾಮನ್ಯರ ಓಡಾಟ , ಸುತ್ತಾಟ ಎಲ್ಲದಕ್ಕೂ ಕಡಿವಾಣ ಬಿದ್ದು , ಒಬ್ಬರನೊಬ್ಬರು  ಭೇಟಿಯಾಗಲು ಅವಕಾಶವಿಲ್ಲದೆ ಬರೀ ಮೊಬೈಲು ವಾಟ್ಸಾಪ್  , ಜೂಮ್ ವೀಡಿಯೋಗಳಲ್ಲಿ ತಮ್ಮ ಕಷ್ಟ ಸುಖ ಹಂಚಿಕೊಂಡು ಕುಟುಂಬ ಸಮೇತರಾಗಿ ಮನೆಯಲ್ಲೇ ಉಳಿದು ಧಾಕಲೆಯನ್ನೇ  ಸೃಷ್ಟಿಸಿದರು . ಬೇಸರ ಕಳೆಯಲು ತಮ್ಮ ಅಭಿರುಚಿಗೆ ತಕ್ಕಂತೆ ನಾನಾ ಕಾರ್ಯದಲ್ಲಿ ತೊಡಗಿಕೊಂಡರು , ಮಕ್ಕಳು ಹೊಸ ಹೊಸ  ಸಾಹಸಗಳನ್ನು ಮಾಡಿದರು .

ಅತ್ತ ದೇವರುಗಳೆಲ್ಲ   ಕೆಲ ದಿನ ಕೆಲಸದ ಒತ್ತಡದಿಂದ  ವಿಶ್ರಾಂತಿ  ಪಡೆದ ನಂತರ ದೇಗುಲದ ತುಂಬೆಲ್ಲಾ ತುಂಬಿಕೊಂಡಿರುತ್ತಿದ್ದ ತಮ್ಮ ಪ್ರೀತಿಯ ಭಕ್ತರ ದರ್ಶನ, ಪೂಜೆ ಪುನಸ್ಕಾರ ಅಭಿಷೇಕ, ಹೋಮ ಹವನಗಳಿಲ್ಲದೆ ಅವರಿಗೂ   ಬೇಸರ ಕಾಡತೊಡಗಿತು  . ಅದ್ಧೂರಿಯಾಗಿ ನಡೆಯುತ್ತಿದ್ದ  ಧಾರ್ಮಿಕ ಚಟುವಟಿಕೆಗಳು , ರಥೋತ್ಸವಗಳು  ಎಲ್ಲದಕ್ಕೂ  ಅಡ್ಡಿಯಾಗಿ  ಭಕ್ತ ಸಮೂಹವಿಲ್ಲದ ದೇವಾಲಯ ಭಣಗುಟ್ಟುತ್ತ,  ಗರ್ಭಗುಡಿಯಲ್ಲಿ ದೇವನೊಬ್ಬನೆ ಒಂಟಿಯಾಗಿರುವ ಪರಿಸ್ಥತಿ ಎದುರಾಯಿತು .

 ಭೂಲೋಕದ ಜನರಂತೆಯೆ ದೇವತೆಗಳೂ  ಸಹ ಜೂಮ್ ವೀಡಿಯೋ  ಮೀಟಿಂಗ್ ಮಾಡಿಕೊಂಡು ಲಾಕ್ ಡೌನ್ ಸಮಯದಲ್ಲಿ ತಮ್ಮ   ಕಷ್ಟ ಸುಖ ಹಂಚಿಕೊಳ್ಳಲು ನಿರ್ಧರಿಸಿದರು . ವೆಂಕಟೇಶ , ಗಣೇಶ , ರಾಮ, ಕೃಷ್ಣ ,ಲಕ್ಷ್ಮಿ ಪಾರ್ವತಿ ಇತ್ಯಾದಿ ದೇವಾನುದೇವತೆಗಳ  ಮೀಟಿಂಗನ್ನು ತ್ರಿಲೋಕ ಸಂಚಾರಿಗಳಾದ  ನಾರದರೆ ಏರ್ಪಡಿಸಿ ಎಲ್ಲರೂ ಒಟ್ಟು ಸೇರಿ  ಮುಕ್ತವಾಗಿ  ಚರ್ಚಿಸುವ ಅವಕಾಶವನ್ನು ಕಲ್ಪಿಸಿದರು !.

ಸಂಕಷ್ಟ ಚತುರ್ಥಿ , ಗಣ ಹೋಮ ಎಂದೆಲ್ಲಾ ಆಗಾಗ ಭಕ್ತರು ಅರ್ಪಿಸುತ್ತಿದ್ದ ಕಡಬು ಮೋದಕಗಳನ್ನು  ಸವಿಯದೆ ಗಣೇಶನ ನಾಲಿಗೆ ಕೆಟ್ಟು ಹೋಗಿತ್ತು . ಹಾಗಾಗಿ  ಪ್ರಥಮ ಪೂಜೆಯನ್ನು ಸ್ವೀಕರಿಸುವ  ಗಣೇಶನೆ  ಆರಂಭದಲ್ಲಿ ಮಾತನಾಡಿ ಬೆಲ್ಲಾ- ಕಡಬು ಮೋದಕಗಳ ನೈವೇದ್ಯವಿಲ್ಲದ  ಊಟವೆ ರುಚಿಸದೆ ( ಬೋರಾಗಿ ) ಈ ವರ್ಷ ತನ್ನ (ಗಣೇಶ ) ಹಬ್ಬಕ್ಕಾದರೂ ಈ ಮಾಹಾಮಾರಿಯನ್ನು ತೊಲಗಿಸಬೇಕು ಎಂದು ಡಿಮ್ಯಾಂಡು ಮಾಡಿದ . ಮಾರ್ಚ/ಏಪ್ರಿಲ್  ತಿಂಗಳೆಂದರೆ  ಪರೀಕ್ಷಾ ಕಾಲ. ವಿದ್ಯಾರ್ಥಿಗಳು   ಗುಂಪು ಗುಂಪಾಗಿ ಗಣೇಶನ  ಗುಡಿಗೆ ಹೋಗುವುದು  ವಾಡಿಕೆ , ಉತ್ತಮ ಅಂಕಗಳಿಂದ ಪಾಸ್ ಮಾಡು ದೇವಾ ಎನ್ನುವ ಬೇಡಿಕೆ! ಆದರೆ ಲಾಕಡೌನಿಂದಾಗಿ ಶಾಲೆ ಕಾಲೇಜುಗಳು ಬಂದಾಗಿ ಬರೀ ಆನ್ ಲೈನುಗಳಲ್ಲೆ ಪಾಠ ಹೇಳಿಸಿಕೊಂಡು ತನಗೆ ಇಪ್ಪತ್ತೊಂದು ದೀರ್ಘದಂಡ ನಮಸ್ಕಾರ ಸಹ ಹಾಕದೆ ಮಕ್ಕಳು ಪಾಸಾಗುವು ಲಕ್ಷಣಗಳಿದ್ದ ಈ ಹೊಸ ಶಿಕ್ಷಣ ಪದ್ದತಿ ಗಣೇಶನಿಗೆ ಸಖೇದಾಶ್ಚರ್ಯ ಉಂಟು  ಮಾಡಿತ್ತು . ಮುಖ್ಯವಾಗಿ ಪ್ರಿಯ ವಿದ್ಯಾರ್ಥಿಗಳ ದರ್ಶನ ಭಾಗ್ಯದಿಂದ ಗಣಪನೆ ವಂಚಿತನಾಗಿದ್ದ .

ಆಂಜನೇಯ ಸ್ಕ್ರೀನಿನ ಮೇಲೆ ಕಡಬು ಮೋದಕಗಳ  ಚಿತ್ರವನ್ನು  ಹಾಕಿ ಕೊಂಚ ಕೀಟಲೆ ಮಾಡಿದಾಗ ಗಣಪ ಕಿರು ನಗೆ ನಕ್ಕು ಪವನ ಪುತ್ರನೊಡನೆ  ಕುಶಲೋಪರಿಗಳ ವಿನಿಮಯ ಮಾಡಿಕೊಂಡು , ಗಂಭೀರವಾಗಿ ಕುಳಿತ ಇತರ ದೇವತೆಗಳಿಗೆ ಮಾತನಾಡಲು ಅನುವು  ಮಾಡಿಕೊಟ್ಟ . ಸಂಕಟಮೋಚನ ಹನುಮಾನ ಎಲ್ಲರಿಗೂ ನಮಸ್ಕರಿಸಿ “ ಪಾಪ !ಈ ಮಾನವರು ಕೊರೊನಾ ಸೋಂಕಿಗೆ ಭಯಭೀತರಾಗಿ  ಮನೆಯೆಲ್ಲೆ ಸಿಲುಕಿಕೊಂಡಿದ್ದಾರೆ  . ಅವರಿಗೆ ನನ್ನಂತೆ ಹಾರುವ ಶಕ್ತಿಯಿದ್ದಿದ್ದರೆ ಹಾರಿಕೊಂಡಾದರೂ ಹೊರಗೆಲ್ಲಾ ಸುತ್ತಾಡಿ  ಲಾಕ್ದೌನ್ ಬೇಸರ ನೀಗಿಸಿಕೊಳ್ಳಬಹುದಿತ್ತು  . ನನ್ನ ಭಕ್ತರ  ದರ್ಶನ ಭಾಗ್ಯವಿಲ್ಲದೆ ನನಗೂ ಬೇಸರವಾಗಿದೆ ,ಶನಿವಾರಗಳಂದು  ನನಗೆ ಪ್ರೀತಿಯಿಂದ ಅರ್ಪಿಸುತ್ತಿದ್ದ  ವಡೆ ಹಾರ ,ವಿಳೇದೆಲೆ, ತುಳಸಿ ಹಾರಗಳನ್ನು ಹಾಕಿಸಿಕೊಂಡು ಅವರ ಕಷ್ಟ ಕೋಟಲೆಗಳನ್ನು ಶಮನ  ಮಾಡ್ತಾ ಹಾಯಾಗಿದ್ದೆ . ಇನ್ನು ಮುಂದಿನ ದಿನಗಳಲ್ಲಿ ದೇಗುಲ ತೆರೆದರೂ ದೇವರ ಮೇಲಿನ ಭಕ್ತಿಗಿಂತಲೂ  ಕೊರೊನಾ  ಮೇಲಿನ ಭಯವೇ ಹೆಚ್ಚಾಗಿ  ಭಕ್ತರು ದೇವಾಲಯದ ಕಡೆ  ಬರದಿದ್ದರೆ ಏನಪ್ಪಾ ಗತಿ  “ ಅಂಜನೇಯನ ದನಿಯಲ್ಲಿ ಸಣ್ಣ ಆತಂಕವಿತ್ತು

 “ ಹಾಗಾಗುವುದು ಅಸಂಭವ  ! ಸಂಕಟ ಬಂದಾಗ ವೆಂಕಟರಮಣ ! ಎಂದು ಜನ ತಮ್ಮ  ಕಷ್ಟ ಕಾಲಕ್ಕೆ ನಮ್ಮನ್ನೇ ಅಲ್ಲವೆ ನೆನೆಯುವುದು!? ಅವರ ರಾಶಿ ಬೇಡಿಕೆಗಳನ್ನು ಈಡೇರಿಸಿಕೊಳ್ಳಲು ಗಂಟೆ ಗಟ್ಟಲೆ ಕ್ಯೂನಲ್ಲಿ ನಿಂತು ದರ್ಶನ ಪಡೆಯುತ್ತಾರೆ,ಚಿಂತಿಸದಿರು  “ ದಿನಕ್ಕೆ ಲಕ್ಷಗಟ್ಟಲೆ ಜನರಿಂದ  ಕಿಕ್ಕಿರಿಯುವ ತಿರುಪತಿಯ ಲಾರ್ಡ್  ಬಾಲಾಜಿ ಆಶ್ವಾಸನೆಯಿತ್ತ  .

“ ಖಂಡಿತ ! ಬಡವ ಬಲ್ಲಿದ ಎಂಬ ಬೇಧವಿಲ್ಲದೆ ನೂಕುನುಗ್ಗಲಿದ್ದರೂ ಭಕ್ತಾದಿಗಳು ನಿನ್ನ ದರ್ಶನಕ್ಕೆ ಬಂದೆ ಬರುತ್ತಾರೆ .ಅಷ್ಟೇ  ಏಕೆ , ಕೆಲ ರಾಜಕಾರಣಿಗಳು , ಬ್ಯುಸಿನೆಸ್ಸ್ಮೆನ್ನುಗಳು ತಾವು ಮಾಡಿದ ಹಗರಣ/ಗೊಲ್ಮಾಲಗಳಿಗೆ ಪ್ರಾಯಶ್ಚಿತ್ತವಾಗಿ   (ಕಪ್ಪು ಹಣದಿಂದಲೆ  ಮಾಡಿಸಿದ )  ಕಪ್ಪ- ಕಾಣಿಕೆ, ಕಿರೀಟ ಪ್ರಭಾವಳಿಗಳನ್ನು  ಅರ್ಪಿಸಲು ನಿನ್ನಂತ ವೀಐಪಿ  ದೇವರೇ ಬೇಕಲ್ಲ  “  ಗಣಪತಿ ತಮಾಷೆ ಮಾಡಿದ.

“ ಆಗ ಗುಂಪಿನಲ್ಲಿ ಗೋವಿಂದಾ  ಎಂದು ನಿನ್ನ  ನಾಮಸ್ಮರಣೆ ಮಾಡುತ್ತಾ ಬರುತ್ತಿದ್ದ ಭಕ್ತರಿಗೆ  ಈಗ  ಗ್ರೂಪಿನಲ್ಲಿದ್ದರೆ (ಹರ ಹರ ) ಗೋವಿಂದಾ ಆಗುವ ಸ್ಥ್ತಿತಿ  ಸೃಷ್ಟಿಯಾಗಿದೆಯಲ್ಲಾ ಲಾರ್ಡ್  ಬಾಲಾಜಿ! ? ಎಂದ ಆಂಜನೇಯ ಹಾಗು  ಗಣಪತಿಯರ ಕೀಟಲೆಯ  ಬಾಯಿ ಮುಚ್ಚಿಸಲು ತಿರುಪತಿ ಲಾಡು ಬಂದು ಬಿತ್ತು.!

ತನ್ನ ಮುದ್ದು ಪುತ್ರನ  ತಮಾಷೆಗೆ ತಾಯಿ ಪಾರ್ವತಿ ಹಸನ್ಮುಖಿಯಾದಳು  . ಹಬ್ಬ ಹರಿದಿನ ಮಂಗಳವಾರ ಶುಕ್ರವಾರಗಳಂದು  ಬನಶಂಕರಿ ದೇವಿ , ಮೂಕಾಂಬಿಕ , ದುರ್ಗಾ ಪರಮೇಶ್ವರಿ , ಮುಂತಾದ ಶಕ್ತಿ ದೇವತೆಗಳಿಗೆ ಸೀರೆ ಉಡಿ ತುಂಬಿ  ನಿಂಬೆ ಹಣ್ಣಿನ ದೀಪ ಹಚ್ಚಿ  ಭಕ್ತಿಯಿಂದ ಪೂಜಿಸುತ್ತಿದ್ದ ಮಾಹಿಳೆಯರು ಈ ಕೊರೊನಾ  ಕಾಲದಲ್ಲಿ  ನಮ್ಮ ದರ್ಶನಕ್ಕೂ  ಬರದಂತಾಗಿದೆ,  “ ಎಂದು ದೇವಿಯರ  ಪರವಾಗಿ ಮಾತನಾಡುತ್ತಾ  . “ ಈ ದುರಿತ ಕಾಲದಲ್ಲಿ ಜನ ಎಷ್ಟು ಭಯಭೀತರಾಗಿದ್ದಾರೆಂದರೆ ಸಾಮನ್ಯವಾಗಿ ಧನ , ಧಾನ್ಯ, ಸಂಪತ್ತು ಸಮೃದ್ಧಿಗಾಗಿ ಬೇಡುತ್ತಿದ್ದ ಭಕ್ತರ ದಂಡು  ಪಾಪ ! ಇತ್ತೀಚಿಗೆ ನನ್ನಲ್ಲೂ ಆರೋಗ್ಯ ಭಾಗ್ಯಕ್ಕಾಗೇ ಮೊರೆಯಿಡುತ್ತಿದ್ದಾರೆ .”  ಲಕ್ಷ್ಮಿ ದೇವಿಯೂ ದನಿಗೂಡಿಸಿದಳು  .

“ ಈ ನಡುವೆ ಎಲ್ಲಾ ಕಡೆಯೂ ಸಾಮಾಜಿಕ ಅಂತರ , ಮಾಸ್ಕ್ , ಸ್ಯಾನಿಟೈಸರ್ , ಕ್ವಾರೆಟೈನ್ನ್ಗಳ ಮಾತೆ ಕೇಳಿ ಕೇಳಿ (ಸುದ್ದಿ ವಾಹಿನಿಗಳ ಬ್ರೇಕಿಂಗ್ ನ್ಯೂಸಗಳಂತೆ ) ತಲೆ ಚಿಟ್ ಹಿಡಿದಿದೆ”  . ಇಷ್ಟು ಹೊತ್ತೂ ತಪ್ಪಸ್ಸಿನಲ್ಲಿರುವಂತೆ  ಕುಳಿತ ಸೃಷ್ಟಿಕರ್ತ  ಬ್ರಹ್ಮ ಮೌನ ಮುರಿದ  “ ಈ ದುರಿತ ಕಾಲ  ನರ ಮನುಷ್ಯರು ಭೂಮಿಯ ಮೇಲೆ ತಾವು ಮಾಡುತ್ತಿರುವ ಅನ್ಯಾಯ ಅನಾಚಾರಗಳ ಬಗ್ಗೆ ಅರಿವು ಮೂಡಿಸಿಕೊಳ್ಳಲು ಸಕಾಲವಾಗಿದೆ “

ಬ್ರಹ್ಮನ ಗಂಭೀರ ನುಡಿಗಳಿಗೆ  ಗಣೇಶ  ಬ್ರೇಕ್ ಕೊಡುತ್ತ “ವಿನಾಶ ಕಾಲೇ ವಿಪರೀತ ಬುದ್ದಿ ಎನ್ನುವ ಹಾಗೆ  ಗೋಬಿ ಮಂಚೂರಿ ಮಾಡುವಂತೆ ಗೂಬೆ ಮಂಚೂರಿ ಮಾಡಿ ತಿಂದು ತೇಗಿ ಇಡಿ ವಿಶ್ವಕ್ಕೆ ಈ  ಪರಿಯ ಕಂಟಕ ತಂದಿದ್ದಲ್ಲದೆ ಯಾರೋ ಮಾಡಿದ ತಪ್ಪಿಗೆ ಇನ್ಯಾರೋ ಮುಖ ಮುಚ್ಚಿ (ಮಾಸ್ಸ್ಕ್ ಧಾರಿಗಳಾಗಿ ) ಓಡಾಡುವ ಹಾಗಾಗಿದೆ !.”

“ ಸತ್ಯವಾದ ಮಾತು ವಿನಾಯಕ ! ಮನುಷ್ಯ ಪ್ರಾಣಿಗಳ ಅಂಗಾಂಗಳನ್ನು ರಚನೆ ಮಾಡುವಾಗ ಕಿವಿಗಳ ಪಾತ್ರ ಎಷ್ಟು ಮುಖ್ಯವಾಗಿತ್ತು (ಮಾಸ್ಕ್ ಹಾಕಿಕೊಳ್ಳಲು)  ಅಲ್ಲವೇ ಬೃಹ್ಮ್ಮಾಜಿ !?  “ಎನ್ನುತ್ತಾ  ಹನುಮಂತನೂ   ಹಾಸ್ಯದ  ಕಚಗುಳಿಯಿಟ್ಟಾಗ ಬೃಹ್ಮನ ಮುಖಕಮಲದಲ್ಲೂ ಕಿರುನಗೆ ಮಿಂಚಿತು!.

ಅರೆ ನಿಮೀಲಿತ ನೇತ್ರಧಾರಿಯಾಗಿ ಶಾಂತ ಮುದ್ರೆಯಲ್ಲಿದ್ದ  ಶಿವ “ ಕಾಲಾಯ ತಸ್ಮೆ ನಮಃ !  ಈ ಮನುಷ್ಯ ಜೀವಿಗಳು ಒಮ್ಮೊಮ್ಮೆ  ದೇವತೆಗಳ ಹಾಗೆ  ತಾವೂ ಸಹ ಅಮರರು ಎಂಬ ಭ್ರಮೆಯಲ್ಲಿ ತೇಲಾಡಿಕೊಂಡಿರುತ್ತಾರೆ .ಅವರ ಬೊಗಸೆಯಲ್ಲಿ  ಹಿಡಿದಷ್ಟೇ ಆಯಸ್ಸು ಪ್ರಾಪ್ತಿ ಎನ್ನುವುದು ಮರೆತು   ಹೆಣ್ಣು ಹೊನ್ನು ಮಣ್ಣುಗಳ ದುರಾಸೆಯಲ್ಲಿ ಮುಳಿಗೇಳುತ್ತಿದ್ದಾರೆ. ಪರಿಸರ ವಿನಾಶಕ್ಕೆ  ಕಾರಣವಾಗುತ್ತಿದ್ದಾರೆ . ಪಶು ಪಕ್ಷಿಗಳ ಜೊತೆಗಿನ   ಅಮಾನವೀಯ ನಡವಳಿಕೆ  ಅಕ್ಷಮ್ಯ ಅಪರಾಧ !, ಪ್ರಕೃತಿ ಮಾತೆಯೊಂದಿಗೆ ಸಾಮರಸ್ಯದಿಂದಿರದೆ ಅಗೌರವದಿಂದ ನಡೆದುಕೊಂಡರೆ ಆಕೆಯ ಮುನಿಸಿಗೆ ತುತ್ತಾಗಬೇಕಾಗುತ್ತದೆ . ಇದು ಇಡಿ ಜಗತ್ತಿಗೆ ಒಂದು ಪಾಠವಾಗಿ  ಪರಿಣಮಿಸಲಿದೆ “ ಎಚ್ಚರಿಕೆಯ ನುಡಿಗಳನ್ನು ಹೇಳಿದ .

 ಎಲ್ಲರ ಮಾತುಗಳನ್ನು ತನ್ಮತೆಯಿಂದ ಆಲಿಸುತ್ತಿದ್ದ  ಕೃಷ್ಣ ಪರಮಾತ್ಮ ಸ್ಕ್ರೀನಿನ ಮೇಲೆ ಪ್ರತ್ಯಕ್ಷನಾಗಿ   “ ಮನುಕುಲ ಅನುಭವಿಸುತ್ತಿರುವ ಈ ವಿಷಮ  ಪರಿಸ್ಥಿತಿಗೆ ಅರಿತೋ ಅರಿಯದೆಯೋ ಅವರು ಮಾಡಿದ ಪಾಪ ಕರ್ಮಗಳೆ ಕಾರಣ . ದುಷ್ಟ ಶಕ್ತಿಯ ಸಂಹಾರಕ್ಕಾಗಿ ನಾನು ಸಂಭವಾಮಿ ಯುಗೇ ಯುಗೇ ಎಂದು ಗೀತೆಯಲ್ಲಿ ನುಡಿದಿದ್ದೇನೆ . ಚೀನಾ ದೇಶದಲ್ಲಿ  ಉಗಮವಾದ ಕೊರೊನಾ ವೈರಿ  ಚೀನಾ ವಸ್ತುವಿನಂತೆ ಬಹಳ ಕಾಲ ಇರದೆ ನಾಶವಾಗಲಿದೆ “ ಎಂದು ಮುಗುಳ್ನಕ್ಕಾಗ ದೇವಾನುದೇವತೆಗಳು ಅವನ  ಅರ್ಥಗರ್ಭಿತ ನುಡಿ ಮುತ್ತುಗಳಿಗೆ ತಲೆ ತೂಗಿದರು . ನಾರದರು ” ನಾರಾಯಣ ನಾರಾಯಣ” ಎನ್ನುತ್ತಾ ಜೂಮ್ ವೀಡಿಯೋ ಮೀಟಿಂಗನ್ನು ಸಮಾಪ್ತಿಗೊಳಿಸಿದರು .

ಲಾಕ್ಡೌನ್ ಮುಕ್ತ ಭಾರತದಲ್ಲಿ  ಭಕ್ತಾದಿಗಳು ಎಂದಿನಂತೆ  ದೇವರ ದರ್ಶನ  ಪಡೆದು ಪುನೀತರಾಗಲಿ ಎಂದು ಎಲ್ಲಾ ದೇವಾನುದೇವತೆಗಳು ಭಕ್ತ ಕೋಟಿಯನ್ನು   ಆಶೀರ್ವದಿಸಿ ಮಾಸ್ಕ್ ಧಾರಿ ಅರ್ಚಕರಿಂದ ಪೂಜಾರ್ಚನೆ ,ಅಭಿಷೇಕ  , ಥರ್ಮಲ್ ಸ್ಕ್ರೀನಿಂಗ್ , ಸ್ಯಾನಿಟೈಸರ್  ಸೇವೆ ಮಾಡಿಸಿಕೊಂಡು  ವೈರಾಣು ಮುಕ್ತರಾಗಿ (ಶುದ್ಧರಾದ   ) ಭಕ್ತರ ದರ್ಶನ ಸ್ವೀಕರಿಸಲು  ಸಜ್ಜಾದರು .

ಆರತಿ ಘಟಿಕಾರ್