ಹತಾಶೆ

+

ಹತಾಶೆ

ಕಣ್ಣು ಹಿಗ್ಗಿದಷ್ಟೂ ಪತನದ ಹಾದಿಯ

ಹಿನ್ನೋಟ ;

ಖುಷಿಯೆನಿಸಿತೇನೋ ಮಂಕು ಬಡಿದ ಅರಿವಿಗೆ

ಚಲ್ಲಾಟ ;

ಆಸೆಯ ಗೂಡಿನಲ್ಲಿ ಕಾವು ಕೊಡದೆ ನಿಂತ

ನಿರ್ಲಿಪ್ತ ಸರಳುಗಳ

ತಣ್ಣನೆಯ ನೋಟ,

ಹೊತ್ತು ಉರಿಯಲಿಲ್ಲ

ದೀವಿಗೆಯ ಆಟ .

ತೇಲುವ ಮುಗಿಲಿಗೂ ಜೋತು

ಬಿತ್ತೆ ಮನ ?

ಬಿದ್ದ ಕರಾಳ ಏಟಿಗೆ ಸತ್ತಂತೆ

ನಟಿಸುತ್ತ ಹೊರಳು ನೋಡದ

ಚೇತನ ,

ಬಿಟ್ಟು ಹೋದ ಕಣ್ಣೀರ ಕಲೆಯಲ್ಲೂ

ಕಹಿಕ್ಷಣಗಳದೇ

ಚಿತ್ರಣ ;

ಕೊನರದ ಹೂಗಳ

ನಗುವಿಲ್ಲದ ಕ್ಷಣ ;

ಸುತ್ತುವ ಭುವಿಯನ್ನೂ

ತಡೆಯಲೆತ್ನಿಸುವ ಕರಗಳು ;

ಎಲ್ಲಿ ಹೋದವು ಕನಸುಗಳು ?

ಬೆಂಬಿಡದೆ ಹಿಂಬಾಲಿಸುವ ಸುಟ್ಟು

ಭಾವನೆಗಳ ಕರಿ ನೆರಳು;

ನಿಟ್ಟುಸಿರಿನಲ್ಲೂ ಸಣ್ಣಗೆ

ತೇಲಿ ಬರುವ

ಶೂನ್ಯ ರಾಗದ ಹಾಡುಗಳು .......