ಭಿಶ್ಕಿ ಜೂಸ್

ಪುಟ್ಟ ಮಕ್ಕಳ  ತೊದಲು  ನುಡಿಗಳು   ಪೋಷಕರಿಗೆ ಸದಾ  ಅಪಾರ ಖುಷಿ ಕೊಡುವಂತಾದ್ದು . ಅವರ ಮುದ್ದಾದ ಆಟ ಪಾಟ ಎಲ್ಲವೂ ಕಣ್ಣಿಗೆ ಹಬ್ಬ, ಬೆಲೆ ಕಟ್ಟಲಾಗದಂತ   ಆನಂದವನ್ನು  ಉಂಟು ಮಾಡುತ್ತದೆ .ಆದರೆ ಒಮ್ಮೊಮ್ಮೆ ಈ ಪುಟಾಣಿಗಳು   ಅತಿ ಉತ್ಸಾಹದ ಬುಗ್ಗೆಗಳಾಗಿ  ಚಟಪಟ ಮಾತಾಡುತ್ತಾ   ಬಂದವರ ಮುಂದೆ ನಮ್ಮ ಗುಟ್ಟುಗಳ ಸೈರನ್ ಊದಿ ನಮಗೆ ಫಜೀತಿ ತಂದೊಡ್ಡಿ ಬಿಡುತ್ತವೆ .

 ಈಗ ಕಾಲೇಜು ಮೆಟ್ಟಿಲೇರಿರುವ  ನನ್ನ ಮಗ ಆಗ ನಾಲ್ಕು ವರ್ಷದ ತುಂಟ ಪೋರ . ಅವನಿಗೆ ತೊದಲು ಮಾತು ಬಂದಿದ್ದೆ ತಡ ಆಗಾಗ ಮನೆಯಲ್ಲಿ ನಾವು ಮಾತಾಡಿಕೊಂಡ ವಿಷಯಗಳನ್ನು  ಡಿಶ್ ಆಂಟೆನಾದಂತ  ತೆರೆದ ಕಿವಿಯಲ್ಲಿ ಕೇಳಿಸಿಕೊಂಡು ಕಂಪ್ಯೂಟರ್ ಚಿಪ್ಪಿನಂತ  ತನ್ನ ಪುಟ್ಟ ತಲೆಯಲ್ಲಿ ಕಾಪಿಟ್ಟುಕೊಂಡು ಬಿಡುತಿದ್ದ . ಸಾಮಾನ್ಯವಾಗಿ ಪ್ರಶ್ನೆ ಪತ್ರಿಕೆಯಲ್ಲಿ ಬರುವ “ಯಾರು ಯಾರಿಗೆ ಯಾವ ಸಂದರ್ಭದಲ್ಲಿ ಹೇಳಿದ್ದು”  ಎಂಬ ಪ್ರಶ್ನೆಯಂತೆ ಈ  ತುಂಟ ಸಹ ನಾವು ಬಾಯಿತಪ್ಪಿ ಮಾತಾಡಿಕೊಂಡ  ವಿಷಯಗಳನ್ನು ಆ ಸಂಬಂಧಪಟ್ಟವರು  ಎದಿರು ಸಿಕ್ಕಲ್ಲಿ ಅವನ ಮೆಮೊರಿ ಚಿಪ್ಪಿನಿಂದ ಸಕಾಲಕ್ಕೆ ತೆರೆದಿಟ್ಟು  ನಮ್ಮನ್ನು ಮುಜುಗರಕ್ಕೀಡು ಮಾಡಿ ಬಿಡುತ್ತಿದ್ದ .

ಅಂದು ನಮ್ಮ ಪಕ್ಕದ ಮನೆಯ ಪುಟ್ಟ  ಸೂರಜ್ ಹುಟ್ಟು ಹಬ್ಬ ಜೋರಾಗಿ ನಡೆದಿತ್ತು .ಪುಟಾಣಿ ಮಕ್ಕಳ ಚಿಲಿಪಿಲಿ ಗಲಾಟೆ , ಆಟಗಳ ನಡುವೆ ಕೇಕ್ ಕತ್ತರಿಸಿದ ನಂತರ ನಮ್ಮ ಉಡುಗೊರೆ ಸೂರಜನಿಗೆ ಕೊಟ್ಟಿದ್ದೆ ತಡ ನಮ್ಮ ತುಂಟ ಮಗರಾಯ ಎಲ್ಲಿಂದಲೋ ಪ್ರತ್ಯಕ್ಷನಾಗಿ ಸೂರಜ್  ಅಮ್ಮನ ಕೈ ಜಗ್ಗಿ “ಇದು ನಮ್ಮದೇ ಫ್ಲೋರಿನ ಪ್ರೀತಿ ಆಂಟಿ ಕೊಟ್ಟ ಗಿಫ್ಟು “ ಎಂದು ತನ್ನ ತೊದಲು ನುಡಿಯಲ್ಲಿ ಹೇಳಿದಾಗ ನಮ್ಮ ಪುಣ್ಯಕ್ಕೆ  ಆ ಮಕ್ಕಳ ಗಲಾಟೆಯಲ್ಲಿ ಅವನ ಬಾಲ ಭಾಷೆ ಆಕೆಗೆ ಸರಿಯಾಗಿ ಅರ್ಥವಾಗದೆ  ನಾವು ಬಚಾವಾಗಿದ್ದೆವು . (ತಿಂಗಳ ಹಿಂದಷ್ಟೇ ಅವನ ಹುಟ್ಟು ಹಬ್ಬಕ್ಕೆ ಉಡುಗೊರೆಯಾಗಿ  ಬಂದ  ಆಟಾಸಾಮನುಗಳಲಿ ಒಂದೆರಡನ್ನು ಮುಂದೆಂದಾರೂ ಉಪಯೋಗಕ್ಕೆ ಬರಬಹುದು ಎಂದು ನಾನು ಎತ್ತಿಟ್ಟಿದ್ದನ್ನು  ನಮ್ಮ ತುಂಟನ  ಸೀಸೀ ಟೀವೀಯಂತ ಕ್ಯಾಮೆರಾ  ಕಣ್ಣುಗಳು ಹಿಡಿದಿಟ್ಟುಕೊಂಡಿದ್ದರ  ಕಿಂಚಿತ್ ಸುಳಿವೂ ಸಹ ನಮಗಿರಲಿಲ್ಲ ) ಅಂತೂ ಪಾರ್ಟಿ ಸಂಪನ್ನವಾಗುವ ತನಕ ಸೂರಜನ ಅಮ್ಮನ ಮುಂದೆ ಇವನು ಸುಳಿದಾಡದಂತೆ  ಎಚ್ಚರವಹಿಸಿ ಉಸ್ಸಪ್ಪ ಎಂದು ನಿಟ್ಟಿಸಿರು ಬಿಟ್ಟೆವು .

ಇವನ ಅಗಾಧ ಬುದ್ಧಿಮತ್ತೆ ,ನೆನಪಿನ ಶಕ್ತಿ, ವಿಷಯ ಸಂಗ್ರಹಣೆಯ  ಪ್ರದರ್ಶನಗಳು  ನಮ್ಮ ಊಹೆಗೂ ಮೀರಿ ಆಗಾಗ ನಡೆದಾಗ  ನಮಗೂ ಸಹ ಬಿಟ್ಟಿ ಮನರಂಜನೆ  ಈ ತರಲೆ ಪುಟ್ಟನಿಂದ ಗಿಟ್ಟುತ್ತಿತ್ತು.

ಒಮ್ಮೆ ನಮ್ಮ ಫ್ಲೋರಿಗೆ ಹೊಸದಾಗಿ  ವಾಸಕ್ಕೆ  ಬಂದ  ಮೇಘಾ ದಂಪತಿಗೆ   ನಾನು ಕೊಟ್ಟ ಕೋಡುಬಳೆ ಬಹಳ ಇಷ್ಟವಾಗಿ , ಇದೆ ರೀತಿ ಮಾಡುವುದನ್ನು ಕಲಿಸಿಕೊಡಿ ಎಂದು ದೊಂಬಾಲು ಬಿದ್ದಳು . ಅಂದು ನಾನು ಬಿಡುವಾಗಿದ್ದಾಗ  ಅವಳ ಮನೆಯಲ್ಲಿ ಕೋಡುಬಳೆ ಹಿಟ್ಟು ಮಾಡಿ ಒಂದೆರಡನ್ನು ಕರಿದು  ತೋರಿಸಿ ಮಿಕ್ಕಿದ್ದನ್ನು ಪೂರ್ತಿಗೊಳಿಸಲು ಹೇಳಿ ಬಂದಿದ್ದೆ . ಒಂದೆರಡು ಗಂಟೆಯಲ್ಲೇ ಮೇಘಾಳಿಂದ ಒಂದು ಡಬ್ಬಿ ಕೋಡುಬಳೆ ಗುರುದಕ್ಷಿಣೆ ರೂಪದಲ್ಲಿ ಬಂದಿತು. 
ಅದೇ  ಸಂಜೆಗೆ ನಮ್ಮ ನಾದಿನಿ ಕುಟುಂಬ ಅಚನಕ್ಕಾಗಿ ಆಗಮಿಸಿದಾಗ ತಕ್ಷಣಕ್ಕೆ ಅವರಿಗೂ ಕಾಫಿಯ ಜೊತೆ ಕೋಡುಬಳೆ ಕೊಟ್ಟಾಗ “ತುಂಬಾ ಗರಿ ಗರಿಯಾಗಿ ರುಚಿಯಾಗಿದೆ ! ಹೇಗೆ ಮಾಡಿದ್ರಿ “ ಎನ್ನುವ  ನಾದನಿಯ ಹೊಗಳಿಕೆಗೆ ನಾನು ಉಬ್ಬಿ ಇನ್ನೇನು ಅದರ ವಿಧಾನವನ್ನು ಹೇಳಬೇಕೆನ್ನುವಷ್ಟರಲ್ಲಿ ಅಲ್ಲೇ ಆಟವಾಡಿಕೊಂಡಿದ್ದ  ನಮ್ಮ ಪುಟ್ಟ  ಸತ್ಯ ಹರಿಶ್ಚಂದ್ರ  “ ಅತ್ತೆ ! ಇದು ಅಮ್ಮ ಮಾಡಿಲ್ಲ , ಮೇಘಾ ಆಂಟಿ ತಂದು ಕೊಟ್ರು “ ಎನ್ನುವ  ಸತ್ಯ ವಚನೆ  ಪಾಲನೆ ಯಥೋಚಿತವಾಗಿ  ನಡೆದಾಗ  ನಾದಿನಿ  ಸಂಶಯ ದ್ರಿಷ್ಟಿಯಿಂದ ನನ್ನತ್ತ  ತುಂಟ ನಗೆ ಬೀರಿದ್ದರು. ಇಂತ  ಅಚಾನಕ್ಕಾಗಿ ಎದುರಾಗುವ (ಕರೆಂಟ್ ) ಶಾಕ್ ಗಳ  ಅನುಭವ ನನಗೆ ಸಾಕಷ್ಟು ಇದ್ದುದರಿಂದ ಸಾವರಿಸಿಕೊಂಡು ವರದಿಗಾರಳಂತೆ ಮೇಘಾ ಹಾಗು ನನ್ನ ನಡುವೆ ಜರುಗಿದ ಕೋಡುಬಳೆ ತಯಾರಿಕೆಯ  ಇಂಚಿಂಚು ವಿವರಗಳನ್ನು ಅರುಹಿ ಮಗರಾಯ ಹಾಕಿದ ಸತ್ಯದ (ಚಿನಕುರಳಿ ) ಬಾಂಬನ್ನು ನಿಷ್ಕ್ರಿಯ ಗೊಳಿಸಿದಾಗ ನನ್ನ ನಾದಿನಿಯ ಹೊಗಳಿಕೆಗೆ ಮತ್ತೊಮ್ಮೆ ಪಾತ್ರಳಾಗಿ ಅವರಿಗೂ ಒಂದು ಡಬ್ಬಿ ಕೋಡುಬಳೆ ಮಾಡಿಕೊಡುವ ಹೊರೆ ನನ್ನ ಮೇಲೇ ಬಿದ್ದಿತ್ತು   !

ಏನೇ ಅನ್ನಿ  ಈ ಪ್ರಚಂಡ ಪುಟಾಣಿಯ ದೆಸೆಯಿಂದ ನಾವು ಮುಜುಗರಕ್ಕೀಡಾಗುವ   ಇಂತ ಅನೇಕ ಪೇಚಿನ ಪ್ರಸಂಗಗಳು ಆಗಾಗ ನಡೆದು ಒಮ್ಮೆಮ್ಮೆ  ಕಾಮೆಡಿ ಶೋಗಳ ರೂಪದಲ್ಲಿ ಮರು ನೆನಪಾಗಿ  ನಗೆ ಉಕ್ಕಿಸುತ್ತಿದ್ದವು .

 ಅಂದು ಡಿಸೆಂಬರ್ ಮೂವತ್ತೊಂದರ ವರ್ಷದ ಕೊನೆಯ ದಿನ .  ಎಲ್ಲೆಲ್ಲೂ ಹೊಸ ವರ್ಷದ ಆಗಮನವನ್ನು ಎದಿರು ನೋಡುವ   ಸಂಭ್ರಮ ಮನೆ ಮಾಡಿತ್ತು . ಅಂದು ನಮ್ಮ ಮನೆಯಲ್ಲಿ ಹೊಸ ವರ್ಷದ ಪಾರ್ಟಿಯೊಂದನ್ನು  ಹಮ್ಮಿಕೊಂಡು  ಅಕ್ಕ ಭಾವ , ಒಂದಿಷ್ಟು  ಆಪ್ತ  ಗೆಳೆಯರ ಬಳಗವನ್ನು ಊಟಕ್ಕೆ ಆಹ್ವಾನಿಸಿದ್ದೆವು .ಮುಂಜಾನೆಯಿಂದಲೇ ಔತಣಕೂಟದ  ಏರ್ಪಾಡು ಭರದಿಂದ ಸಾಗಿತ್ತು .

ಇಳಿ ಸಂಜೆಯ ಹೊತ್ತಿಗೆ  ಮೊದಲು  ಗಂಡಸರ ಗುಂಡು ಪಾರ್ಟಿ  ನಂತರ ವಿಶೇಷ ಅಡುಗೆ ಕಾರ್ಯಕ್ರಮ ಎಂಬ ಯೋಜನೆ ಹಾಕಿಕೊಂಡು  ಮಾರ್ಕೆಟ್ಟಿಗೆ  ಹೋಗಿ ಬೇಕಾಗುವ ಸಾಮನು ದಿನಸಿಗಳನ್ನು ತರಲು ಹೊರೆಟೆವು. ನಮ್ಮ ಮುದ್ದು ಪುಟಾಣಿ ಕೂಡ ನಮ್ಮ ಜೊತೆಯಲ್ಲಿ ಇದ್ದ .

ಪಾರ್ಟಿಯ ಸಲುವಾಗಿ ಒಂದಿಷ್ಟು  ಬೀರ್ ಕ್ಯಾನುಗಳು , ಜೊತೆಗೆ ತಿನ್ನಲು ಚಿಪ್ಸ್ , ಕುರುಕಲು ತಿಂಡಿ ತಿನಸುಗಳು ಹಾಗೂ ಇತರ ಅವಶ್ಯಕ  ಸಾಮಾನುಗಳನ್ನೆಲ್ಲ  ಖರೀದಿಸಿದೆವು . ತುಂಟ ಮಗ ಕೂತೂಹಲದಿಂದ  ಎಲ್ಲವನ್ನೂ  ಗಮನಿಸುತ್ತಾ   ನಮ್ಮ ಹಿಂದೆಯೆ ಸುತ್ತುತ್ತಿದ್ದ .  . ಹಿಂದೊಮ್ಮೆ ಸ್ನೇಹಿತರ  ಮನೆಗೆ  ಪಾರ್ಟಿ ಗೆಂದು ಹೋದಾಗ  ಎಜಮಾನರು ಹಾಗೂ ಅವರ ಇತರ  ಗೆಳೆಯರ ಮುಂದಿದ್ದ  ಬೀರ್ ಕ್ಯಾನು ವಿಸ್ಕಿ ಬಾಟಲ್ಲು ಕಂಡು ಮಗ ಕೂತೂಹಲದಿಂದ " ಅಪ್ಪ ಅದೇನು ಕುಡೀತಾ ಇದ್ದೀಯಾ ,ನಂಗೂ ಕೊಡು  " ಎಂದು  ದೊಂಬಾಲು ಬಿದ್ದಾಗ  ಇವರು ಅದು ವಿಷ್ಕಿ  ಅಲ್ಲಲ್ಲ  ಜೂಸು ಪುಟ್ಟಾ ! ತುಂಬಾ  ತಣ್ಣಗಿದೆ ,ಕುಡಿದರೆ ನಿನಗೆ ಕೆಮ್ಮು ಬರುತ್ತೆ  , ಹೊರಗೆ  ಆಟ ಆಡ್ಕೊ ಹೋಗು ಮರಿ “ ಎಂದು  ಅವನ ಮುಗ್ಧ  ಪ್ರಶ್ನೆಗೆ  ಹಾರಿಕೆಯ ಉತ್ತರ ನೀಡಿ  ತಪ್ಪಿಸಿಕೊಂಡಿದ್ದರು . ದೊಡ್ಡವರು ನೀಡುವ ಈ ಉತ್ತರಗಳೆ ಮುಂದೆ ಯಾವುದೋ ಸಂದರ್ಭದಲ್ಲಿ ಎಳ್ಳಷ್ಟೂ ಸೂಚನೆಯಿಲ್ಲದೆ ಮೋಜಿನ (ತಿರುಗು ) ಬಾಣಗಳಂತೆ ನಮಗೇ  ಚುಚ್ಚುಬಹುದು .

ಇನ್ನು ಪೆಪ್ಸ್ಸಿ ಕೋಲಾಗಳ ರುಚಿ ನೋಡಿದ್ದ ನಮ್ಮ ತುಂಟ  ಪುಟಾಣಿಗೆ ಅಂದು ಈ  ಕ್ಯಾನುಗಳಲ್ಲಿರುವ  ಭಿಷ್ಕಿ ಜೂಸು ತಲೆಯಲ್ಲಿ ಕೂತೂಹಲದ ತರಂಗಗಳನ್ನೆ ಹುಟ್ಟು ಹಾಕಿರಬಹುದು .ಅಂತೂ ನಮ್ಮ ಖರೀದಿಯೆಲ್ಲಾ  ಮುಗಿದು  ಇವರು ಹೊಸ ವರ್ಷದ ಪಾರ್ಟಿಗೆ ಜೋರಾದ ತಯಾರಿ ನಡೆಸಿ ಒಂದೆರಡು  ಕ್ರೇಟು ಬೀರ್ ಕ್ಯಾನುಗಳನ್ನು ಹಿಡಿದು ಹೊರ ಬಂದರು  .

ಸಂಜೆಗೆ ನಾನು ರಾತ್ರಿಯ ವಿಶೇಷ ಭೋಜನದ ತಯಾರಿಯಲ್ಲಿದ್ದಾಗ  ನಮ್ಮ ಮನೆಗೆ ಪೂಜೆ ಪುನಸ್ಕಾರಗಳನ್ನು ಮಾಡಿಸುವ ಕೃಷ್ಣ  ಶಾಸ್ತ್ರಿಗಳು  ಅಕಸ್ಮಾತಾಗಿ ಬಂದರು  . ಸರಿ ಉಭಯ ಕುಶಲೊಪರಿಗಳೆಲ್ಲ ಮುಗಿದ ನಂತರ “ ಶಾಸ್ತ್ರಿಗಳೆ ಅಪರೂಪಕ್ಕೆ ಬಂದಿದ್ದೀರಿ ಒಂಚೂರು ಹಾಲು ಕುಡೀರಿ  ಇಲ್ಲಾ ಹಣ್ಣಾದರೂ ತಿನ್ನಿ ,  “ ಎಂದವರ  ಉಪಚಾರದಲ್ಲಿ ತೊಡಗಿದ್ದಾಗ " ಅಯ್ಯೊ! ಮಠದಲ್ಲಿ ಮಧ್ಯಾಹ್ನ ಊಟ ತುಂಬಾ ತಡ ಆಯಿತು , ಅದೇ ಕರಗಿಲ್ಲ ಏನೂ ಬೇಡ ಬಿಡಮ್ಮ “ ಎಂದು ಹೊರಗೆ ಯಾರ  ಮನೆಯಲ್ಲೂ  ಏನನ್ನೂ ತಿನ್ನದ  ಶಾಸ್ತ್ರಿಗಳು ಸಂಕೋಚದಿಂದ ನುಡಿದರು  .

  ಅಲ್ಲೇ ಕಿವಿ ನಿಮಿರಿಸಿಕೊಂಡು ಶಾಸ್ತ್ರಿಗಳಿಗೆ  ನಾನು ಮಾಡುವ ಆದರಾತಿಥ್ಯವನ್ನೆಲ್ಲ ಗಮನಿಸುತ್ತಿದ್ದ ನನ್ನ ತುಂಟ ಮಗ ತಕ್ಷಣ “ ಅಮ್ಮ ಭಿಷ್ಕಿ  (bhishky ) ಕೊಡಮ್ಮ , ಭಿಷ್ಕಿ “ ಎನ್ನುವ ವರಾತ ಶುರು ಮಾಡಿದ .  ಶಾಸ್ತ್ರಿಗಳು  ನನ್ನ ಮಗನ ತೊದಲು  ಭಾಷೆಯನ್ನು ತಮಗೆ ತೋಚಿದಂತೆ ಅರ್ಥೈಸಿಕೊಂಡು   “ ಅಯ್ಯೋ! ಪಾಪ ಮಗು ಬಿಶ್ಕೀಟ್ ( ಬಿಸ್ಕೆಟ್ ) ಕೇಳ್ತಾ ಇದೆ ನೋಡಿ , ನಾನು ಕೂಡ ನಿನಗೆ ಏನೂ ತರಲಿಲ್ವವಲ್ಲೋ ಮರಿ  “ ಎಂದು ಮುದ್ದು ಮಾಡಿದಾಗ ಮಗ ಅವರ ಕೈ ಕೊಸರಿಕೊಂಡು “ ಇಲ್ಲಾ ಭಿಷ್ಕಿ ಜೂಸ್ ತೊಗೋ ಬತ್ತೀನಿ ನಿಮಗೆ , ಒಲಗದೆ ತುಂಬಾ  ಇದೆ “ ಎಂದು  ಒಳಗೋಡಿಯೇ ಬಿಟ್ಟ .! ನಾನಾಗ ಗಾಬರಿಯಿಂದ ಪೀಟಿ ಉಷಾಳಂತೆ ಅವನ ಹಿಂದೆ ಸ್ಪೀಡಿನಲ್ಲಿ ಓಡಿ  ಅವನನ್ನು ಹಿಡಿದು (ತಡೆದು ) “ ಪುಟ್ಟಾ ! ನಿನಗೆ ಬಿಷ್ಕೆಟ್ ಬೇಕಾ ಇರು ಕೊಡ್ತೀನಿ “ ಎಂದು ಅಡುಗೆ ಕೋಣೆಗೆ  ಧಾವಿಸಿ ಬಂದೆ . ಅವನು  “ ಅಮ್ಮ ಇದಲ್ಲ ಅದು   “ ಎಂದು ಒಳಗಡೆ ಕೈ ತೋರಿಸಿ ಅಲ್ಲಗೆಳಿಯುತ್ತಿರುವಾಗಲೇ   ಅವನ ಬಾಯಿಗೆ ಬಲವಂತವಾಗಿ   ಒಂದು ಬಿಸ್ಕೆಟ್ ತುರುಕಿ “ ಪಕ್ಕದ ಮನೆ ಪುಟ್ಟಿ ಬಂದಿದ್ದಾಳೆ ನೋಡು ಆಡ್ಕೊ ಹೋಗು ಮರಿ “  ಎಂದು ಅವನನ್ನು ಹೊರಗೆ  ಸಾಗು ಹಾಕಿ “ ಅಬ್ಬಾ ಸಧ್ಯ, ಈ ತುಂಟ ಮಗನಿಂದ ಈ ಶಾಸ್ತ್ರಿಗಳ ಮುಂದಾಗುವ ಫಜೀತಿ ಹೇಗೂ ತಪ್ಪಿತಲ್ಲ “ ಎಂದು ಸಮಾಧಾನದ  ನಿಟ್ಟಿಸುರು ಬಿಟ್ಟಿದ್ದಾಯಿತು . ಏನೇ ಅನ್ನಿ ಈ ಮೋಜಿನ ಪ್ರಸಂಗ ನೆನಪಾದಾಗಲ್ಲೆಲ್ಲ  ನಗು ಉಕ್ಕಿ ಬರುತ್ತದೆ .

ಆರತಿ ಘಟಿಕಾರ್

ಜೂನ್ ೨೦೨೦೨  ಮಂಗಳ  ಪತ್ರಿಕೆಯಲ್ಲಿ ಬಂದ ಹಾಸ್ಯ ಲೇಖನ 

.