ಸಾಗುತಿಹುದು ಎಲ್ಲೋ ಏನೋ

ಸಾಗುತಿಹುದು ಎಲ್ಲೋ ಏನೋ 

ಹಿಂದುರಿಗಿ ನೋಡದ ಬದುಕು 

ಮನ ಹುಡುಕುತಿರೆ ಇಂದಿಗೂ 

ಸಿರಿ ಅರ್ಥಗಳ ಬೆಳಕು 

ಬಯಕೆ ಸಾಗರ ವಿಶಾಲ ಹರಿವು 

ಮೋಹದಾಚೆಗಿದೆ ತೆನೆಯು 

ಹಚ್ಚಿಟ್ಟ ಒಲವ ಕಾಣದುದಕೆ

ಬರಿದಾಗಿದೆ ಬಿರಿದೆದೆಯು 

ಮನಸು ಮನಸುಗಳ ದೂರ ಯಾನಕೆ 

ಕೊನೆಯಾಗಲಿ ಅಹಮಿನ ನೆರವು 

ಹೊಂದಿಕೆಯ ಹೊದಿಕೆ ಜಾರುತಲಿರೆ 

ಸುಪ್ಪತ್ತಿಗೆಯಲೂ ಹೊರಳಾಡುತಿದೆ ಕೊರಗು 

ಕ್ಷಮೆಯ ಭಾವವಿದೆ  ಹೊಸಿಲ ಬಳಿ

ಬರಲಿಲ್ಲವೇಕೋ ಮನೆ ಒಳಗೂ 

ಮೌನದೆದೆಯ ಮೀಟಿ ನಗಲಿ 

ಮುಗ್ಧ ಮಗುವ ಹೂ ನಗೆಯು 

ಹಸಿರು ಪ್ರೀತಿ ಸ್ನೇಹ ಮರುಕ 

ತೇರನ್ನೆಳೆಯಲಿ ಬದುಕು 

ಸಾಲು ಹಣತೆ ದೀಪ ಬೆಳಗಲಿ 

ಭವ ಬಂಧನದಾ ಎದೆಗೂ  .